Naxçıvan şəhərində Xocalı soyqırımının 33-cü ildönümü ilə əlaqədar ümumtəhsil məktəblərinin şagirdləri arasında “Xocalı-əbədiyaşar faciə” adlı bədii qiraət müsabiqəsi təşkil olunub. Naxçıvan Muxtar Respublikası Gənclər və İdman, Təhsil nazirliklərinin birgə təşkilatçılığı ilə realaşan yarışma soyqırımı qurbanlarının xatirəsini yad etmək, gənc nəslin vətənpərvər və yaradıcı ruhunun zənginləşdirilməsi, sözə, şeirə olan marağın yüksəldilməsi məqsədlərinə xidmət edib.

Tədbirin əvvəlində Xocalı faciəsi zamanı həlak olmuş soydaşlarımızın, şəhidlərimizin xatirəsi bir dəqiqəlik sükutla anılıb. Təşkilatçı qurumların əməkdaşları müsabiqənin əhəmiyyətindən bəhs edib, yarışmanın qaydaları və qiymətləndirmə meyarları barədə məlumatları xatırladıblar.

Müsabiqədə 17 məktəbli Xocalı qətliamı ilə bağlı müxtəlif müəlliflərin qələmə aldığı şeirləri səsləndiriblər. Qiymətləndirməni AMEA Naxçıvan Bölməsinin İncəsənət, Dil və Ədəbiyyat İnstitutunun elmi işlər üzrə direktor müavini, filologiya üzrə fəlsəfə doktoru, dosent, şair-publisist Elxan Məmmədov, Mədəniyyət üzrə Elmi-Metodik Mərkəzin direktoru Səyyar Məmmədov və Naxçıvan Dövlət Milli Musiqili Dram Teatrının aktyoru, peşəkar qiraətçi Nəsimi Məmmədzadənin olduğu münsiflər heyəti həyata keçirib. Mütəxəssislər nəticələr elan olunmazdan öncə müsabiqə iştirakçılarının çıxışları barədə fikirlərini ifadə edib, tənqid və tövsiyələrini diqqətə çatdırıblar.

Yekun qiymətləndirmənin nəticələrinə əsasən Naxçıvan şəhər 3 nömrəli tam orta məktəbin şagirdi Aydan Qasımlı müsabiqənin qalibi olub. 10 nömrəli məktəbdən Nuray Talıbova və 8 nömrəli məktəbdən Duyğu Allahverdiyeva müvafiq olaraq ikinci, üçüncü yerlərə layiq görülüblər.

Adıçəkilən iştirakçılar diplom və hədiyyələrlə mükafatlandırılıblar. Daha 3 məktəbli isə həvəsləndirici yer sahibi kimi təltif olunub.